Fall of Troy

Quintus Smyrnaeus

Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.

  1. Τρωσὶν ἐπεσσεύοντο ποτὶ πτόλιν, οἱ δὲ καὶ αὐτοὶ
  2. τείχεος ἤιον ἐκτός ἐπεί σφεας ἦγεν ἀνάγκη·
  3. ἐν γὰρ δὴ μέσσοισιν Ἔρις στονόεσσά τʼ Ἐνυὼ
  4. στρωφῶντʼ, ἀργαλέῃσιν Ἐριννύσιν εἴκελαι ἄντην,
  5. ἄμφω ἀπὸ στομάτων ὀλοὸν πνείουσαι ὄλεθρον·
  6. ἀμφʼ αὐτοῖσι δὲ Κῆρες ἀναιδέα θυμὸν ἔχουσαι
  7. ἀργαλέως μαίνοντο· φόβος δʼ ἑτέρωθι καὶ Ἄρης
  8. λαοὺς ὀτρύνεσκον· ἐφέσπετο δέ σφισι Δεῖμος
  9. φοινήεντι λύθρῳ πεπαλαγμένος, ὄφρα ἑ φῶτες
  10. οἱ μὲν καρτύνωνται ὁρώμενοι, οἱ δὲ φέβωνται·
  11. πάντῃ δʼ αἰγανέαι τε καὶ ἔγχεα καὶ βέλἐ ἀνδρῶν,
  12. ἄλλυδις ἄλλα χέοντο κακοῦ μεμαῶτα φόνοιο·
  13. ἀμφὶ δʼ ἄρα σφίσι δοῦπος ἐρειδομένοισιν ὀρώρει,
  14. μαρναμένων ἑκάτερθε κατὰ φθισήνορα χάρμην.
  15. Ἔνθʼ ἄρα Λαοδάμαντα Νεοπτόλεμος κατέπεφνεν,
  16. ὃς τράφη ἐν Λυκίῃ Ξάνθου παρὰ καλὰ ῥέεθρα,
  17. ὅν ποτʼ ἐριγδούποιο Διὸς δάμαρ ἀνθρώποισι
  18. Λητὼ δἶ ἀνέφηνεν ἀναρρήξασα χέρεσσι
  19. τρηχὺ πέδον Λυκίης ἐρικυδέος, ὁππόθʼ ἑοῖο
  20. θεσπεσίου τοκετοῖο πολυτλήτῃσιν ἀνίῃ